BE

BE

Kërkesa e BE-së për futjen e "Trepçës" në dialog acaron Prishtinën

Publikuar më 06 Shkurt 2019

Artikuj të ngjashëm

Është unifikuar spektri politik në Kosovë në kundërpërgjigjen dhënë ndaj qëndrimit të Bashkimit Evropian (BE) për ta bërë "Trepçën" temë në dialogun me Serbinë. Zotimi i dhënë në Prishtinë është se për gjigantin ekonomik nuk do të negociohet me kurrkënd, shkruan sot "Koha Ditore".

Në fundjavë, me më shumë se dy të tretat e votave, Kuvendi ka miratuar Statutin, me të cilin është hapur rruga që njësitë thelbësore të ndërmarrjes, që ishte nën menaxhimin e AKP-së, të regjistrohen si pjesë të shoqërisë aksionare "Trepça".

Aksionar kryesor i ndërmarrjes së re është Qeveria, ndërkaq 20 për qind të aksioneve u takojnë punëtorëve. Dhe, shkaku që një pjesë e njësive ndodhen në veriun e banuar me serbë, Beogradi zyrtar ka reaguar dhe ka paralajmëruar se nuk do të kthehet në dialogun e sponsorizuar nga Brukseli pa shfuqizimin e Statutit, sikurse edhe pa e hequr Kosova taksën ndaj produkteve me origjinë serbe.

Serbia kërkon që për statusin e "Trepçës" të vendoset në marrëveshjen finale që synohet ta prodhojë ky proces dialogu.

Të martën Maja Kociançiq, zëdhënëse e komisioneres Federica Mogherini, e cila e lehtëson dialogun Kosovë-Serbi, ka thënë se çështja e "Trepçës" duhet të zgjidhet në Bruksel.