Rajon-Botë

Rajon-Botë

Miratohet kërkesa për paraburgimin e gjashtë deputetëve të VMRO-DPMNE-së

Publikuar më 30 Nëntor 2017

Artikuj të ngjashëm

Shiko arkivën e lajmeve

Komisioni për Çështje të Rregulloreve dhe të Mandatit dhe Imunitetit propozoi që Kuvendi i RM-së t'i heqë imunitetin gjashtë deputetëve të VMRO-DPMNE-së për shkak të pjesëmarrjes së tyre në dhunën në Kuvend më 27 prill.

Komisioni individualisht u prononcua për secilin prej deputetëve.

Vetëm deputeti i LSDM-së, Aleksandar Kiracovski, pati një fjalim të shkurtër para kolegëve, duke vlerësuar se ngjarjet e 27 prillit ishin sulm ndaj demokracisë dhe rendit kushtetues të vendit dhe tentativë për rrezikimin e jetës së deputetëve. Institucionet e sistemit, sipas tij, kanë detyrë ta zbardhin këtë rast për të mos u përsëritur më asnjëherë.

Në seancë të pranishëm ishin deputetët nga shumica qeveritare, ndërsa kolegët e tyre nga opozita nuk u paraqitën në sallën "Boris Trajkovski" në Kuvend.

Në përputhje me nenin 53, paragrafi 5 i Rregullores së Kuvendit të Republikës së Maqedonisë, kryetari i Kuvendit Xhaferi ia dorëzoi Komisionit për Çështje të Rregulloreve, Mandatit dhe Imunitetit kërkesat për aprovimin e paraburgimit të deputetëve Kërsto Mukoski, Ljuben Arnaudov, Johan Tarçullovski, Sasho Vasilevski, Ljupço Dimovski dhe Zhaklina Peshevska, të parashtruara nga Gjykata Themelore Shkup I Shkup, Seksioni për krim të organizuar dhe korrupsion IV KOK.PP. nr.384/17 prej më 28 nëntor të vitit 2017.

Komisioni obligohet ta shqyrtojë dhe në afat prej dy ditëve të dorëzojë raport deri te kryetari i Kuvendit. Në bazë të raportit të Komisionit, Kuvendi më së voni në afat prej tre ditëve nga marrja e kërkesës për paraburgim të deputetit, vendos për kërkesën. Për heqjen e imunitetit të deputetit është e nevojshme shumicë e thjeshtë. Pas njoftimit për paraburgim të deputetit, i cili nuk i referohet imunitetit, Kuvendi mund të vendos të zbatohet imuniteti ndaj deputetit, nëse kjo është e nevojshme për kryerjen e funksionit të deputetit.

Deputetët në pushtet kanë shumicë në Komisionin për Çështje të Rregulloreve dhe Mandatit dhe Imunitetit, kështu që pritet vendimi të sillet edhe nëse deputetët e opozitës gjegjësisht të VMRO-DPMNE-së nuk marrin pjesë në seancë. Anëtarë të këtij komisioni janë edhe dy nga deputetët për të cilët ka informacione se është kërkuar paraburgim, por sipas Rregullores edhe ata duhet të njoftohen për seancën. Vendin e tyre në Komision do ta marrin zëvendësanëtarët e grupit të deputetëve.

Zëvendëskryetari i Komisionit është deputeti Petar Atanasov, ndërsa anëtarë janë Miroslav Jovanoviç, Aleksandar Kiracovski, Sashko Kostov, Agim Shaqiri, Trajko Veljanoski, Johan Tarçullovski, Kërsto Mukoski dhe Boris Zmejkovski, ndërsa zëvendës janë Goran Misovski, Hari Lokvenec, Sashko Atanasov, Mirsada Emini - Asani, Vladimir Gjorçev, Nevenka Stamenkovska, Nikolla Poposki dhe Zoran Gjorgjievski.

Disa deputetë janë në mesin e 36-të personave të cilët Prokuroria Publike Themelore i akuzon për "rrezikim terrorist të rendit kushtetues dhe sigurisë", lidhur me ngjarjet e 27 prillit të këtij vitit në Kuvendin e Republikës së Maqedonisë.